「男友」出軌背叛 炎明熹崩潰爆喊
生日前夕出新歌 首拍纏綿戲零尷尬
炎明熹（Gigi）推出新歌《還有一艘救生艙》，慶祝今日19歲生日。生日前夕出歌，Gigi特別為這份給自己的生日禮物奉獻了多個第一次！為MV首次拍親熱鏡頭的她笑言投入演出，故不感尷尬。由於她太過入戲，演出被男友出軌背叛時流出真眼淚，更決堤式淚崩！
炎明熹於生日前夕推出全新作品《還有一艘救生艙》，除了首次參與編曲，更在MV中奉獻多個第一次！MV故事講述Gigi與男友長期分隔異地，但對方卻背她另結新歡，Gigi發現後心如刀割！導演要Gigi拿着手提電話幻想與男主角對話，此時她淚如雨下、雙唇不自覺顫抖，完美表達「痛」的感覺。她說：「拍MV前，導演同我講咗個故事，雖然我冇經歷過，唔可以話身同感受，但至少拍MV時畀到我一種纏綿、開心、幸福嘅感覺，當然男主角Timothy好帶動到我入戲，我亦冇諗過會喊到出嚟，平時一係喊唔到，一係就谷住咗，Feel到要喊，但又冇眼淚，所以係好幸運嘅一天。」
除了首次拍淚崩MV，也是Gigi首次與男主角如此親密。導演加入大量兩人甜蜜拍拖的畫面，最搞笑是兩人從未玩過滾軸溜冰，導演唯有讓他們脫去溜冰鞋，穿上襪子在溜冰場扮溜冰。Gigi說：「上次拍《Only For Me》MV跳華爾茲，我覺得已經同男主角好近，估唔到今次更近，算係一個新嘗試，同埋大家投入咗喺戲入面，所以唔會覺得尷尬，或者有唔舒服嘅地方。」
接受異地戀
拍攝期間，Gigi經常忍不住笑，她解釋：「我笑點比較低，忍唔住笑唔係因為尷尬，例如見到男主角出軌嘅訊息，留言話『Do You Want Me』再加埋個心心emoji，我一見到就笑咗，覺得好肉麻。同埋我平時影相，啲人叫我畀心心，我係唔會做，因為畀心心我覺得有啲尷尬。」
從未試過拍拖的Gigi要演出Long D關係，她坦言最初不知什麼是Long D：「後來我問人，原來係異地戀嘅意思。我唔知自己將來會唔會接受，但暫時我覺得可以接受，因為未經歷過呢種情況，可能都係一個好處，因為日日見好快會厭，但隔一排再見就可以有新鮮感。大家不妨留言話我知，分享你哋嘅故事畀我聽。」
