林景程獲姜大衛傳授喊功
香港文匯報訊（記者 梁靜儀）《逆天奇案2》前晚一集展開新單元「龍頭棍風暴」，劇情講述社團洪勝話事人賀堅（姜大衛John哥飾）打算退隱江湖，賀堅兒子賀永權（林景程飾）和韓耀星（翟威廉飾）欲爭話事人之位，兩雄相爭引起警方高度關注。
景程坦言能夠與John哥合作感到好開心亦好難得，對演戲的人來說，John哥真係可以講得上是活寶藏！他說：「有向John哥請教演戲心得，我記得未埋位前請教過佢，會用咩方法投入角色嘅感情同點樣控制淚水，佢真係毫不吝嗇咁分享，仲即場示範點樣控制淚水畀我睇，睇佢做好似好容易咁，但實際真係幾廿年功力嚟！同埋John哥分享期間，咁啱導演叫我埋位拍攝，我諗嗰次係我入行以嚟最唔想埋位嘅一次！」
繼早前在《下流上車族》與金像影后鮑起靜結母子緣，如今再與亞洲影帝John哥結父子緣，名副其實是「影帝影后御用囝囝」，對此景程直言感到十分榮幸：「兩位都係我以前諗都唔敢諗可以合作到嘅前輩，現在仲可以演到佢哋個仔，坦白講呢啲機會真係可遇不可求，我覺得我比好多演員好彩，希望未來仲會有呢啲機會啦！」
王嘉慧撇甩乖女形象演小三
飾演小三Jenny的王嘉慧（Cathy）化身性感尤物上演「小三爭上位實錄」，除了講大話逼林景程離婚外，被大婆吳沚默（Momo）捉姦時，亦不失霸氣與對方拉扯對罵，與平時斯文乖女形象反差極大。自言是《逆天奇案》粉絲的Cathy說：「第一輯係全部都有追睇晒，覺得自己有份參與《逆天2》好神奇，好開心同埋感恩。」
她續指今次角色很有挑戰性：「始終同平時嘅自己好唔同，都會擔心演唔出嗰種效果，所以都有做好多功課，參考其他劇集、電影類似嘅角色係會點樣去做。」講到與吳沚默的拉扯對罵戲，Cathy坦言一開始其實有點唔好意思，驚拉扯途中會整親對方，但是Momo好好，並鼓勵她放膽去做，好帶到自己入戲。
另外，前港姐冠軍謝嘉怡閃現客串幼兒園老師一角，令人大感驚喜。
