馬德鐘盼與阿佘再鬥「戲」
怕麻煩 唔享受左右逢源
馬德鐘（馬神）在剛播畢的無綫懸疑愛情劇《再見·枕邊人》中，周旋於失憶太太顧天晴及紅顏知己朱善美之間，馬神飾演心思縝密、帶點陰沉的角色，演戲多年的他不諱言希望演有新鮮感的角色。他曾跟多位花旦合作，當中2005年他與佘詩曼（阿佘）合演《鳳凰四重奏》，更令女方首封視后，他盼未來有機會與舊拍檔阿佘再合作拍劇。
採訪 梁靜儀 攝影 彭子文
無綫劇《再見·枕邊人》故事講述資深記者顧晴天（黃智雯飾）因一次意外掉下山崖兼離奇流落印尼，昏迷長達6年半後終於醒來，但失去所有記憶，晴天老公楊萬森（馬德鐘飾），經過7年尋覓及守候終決定放棄，香港法例亦有指一個人失蹤7年後，其家屬可申請該人在法律上死亡，就在萬森決定與多年來對自己不離不棄的紅顏知己朱善美（張曦雯飾）結為夫婦，晴天卻碰巧在二人的大婚之日重現萬森眼前。
劇中馬神周旋於黃智雯及張曦雯之間，可謂艷福不淺，問到現實中又可有遇過兩女爭一男？他笑言：「冇啲咁嘅嘢。」身形高大兼有男人味的他，沒女生仰慕的確令人難以信服，馬神卻認為不一定：「未必嘅，可能有啲人驚（我），因為我唔出聲個樣都幾得人驚。（當日太太有冇驚？）當日我主動追佢又唔同嘅。」對於劇中角色左右逢源，令不少男觀眾大為羨慕，但馬神卻稱不享受：「我諗都好難應付啩？（時間方面？）係呀，好難講。每一個人需求唔一樣，有啲人可能好享受。（你唔享受？）我個角色都唔享受啦，佢有時真係會唔識做，突然佢好想做啲嘢補救，嗰邊就話有啲好危急嘅嘢，你會點呢？會搞到自己囉！做人應該自在啲。」
說到拍劇的難忘事，馬神首推是一場與黃智雯的落水戲：「適逢拍攝當日天氣突然降溫兼翻風，仲要拍到凌晨四五點，我覺得好凍，所以我好佩服智雯，佢一直浸咗好耐，拍完一個鏡頭佢都唔上水，我話我唔得上去先。」想不到曾做過紀律部隊G4的馬神，比女生還要怕冷。
分享夫妻相處之道
馬神與太太張筱蘭結婚多年，承認年輕時夫妻之間必定會鬧交，但現在已很少爭執。他分享解決問題的方法：「有問題靜一靜先，唔好衝住個火頭去，其實好多嘢，當你一冷靜咗之後，每一樣嘢都可能係好小事， 只不過係小事之中，大家頂撞就變咗大事。（多數你認錯先？）又唔使話邊個認錯，咁多年夫妻，大家睇情況去遷就。」難怪馬神與太太越來越恩愛。
今次再與黃智雯合作，更是二人第一次演夫妻，他大讚對方：「智雯第一套劇《東山飄雨西關晴》我已經同佢合作，今次合作當然好唔同，佢演戲方面好成熟，但佢本身性格冇變，仲係好開朗。」至於第三度合作的張曦雯，他覺得對方有很大轉變，因她的角色偏向反派又惹人討厭，但她沒有包袱去演，都演得不俗。
希望演新鮮角色
跟無綫簽部頭約的馬神，近年都是一年拍一劇，去年拍了《非常檢控觀》，而《再見·枕邊人》則是前年拍。馬神入行多年，演過無數角色，亦跟不少花旦合作過，他不諱言希望有新鮮角色出現：「演員好被動，尤其當你有所求，但求不得就會唔開心，隨遇而安好嘞。」
去年佘詩曼回歸無綫拍劇，當年她憑與馬德鐘合演的《鳳凰四重奏》首度奪得視后，馬神表示有看阿佘的《新聞女王》，有機會想再合作，最想合演民初劇。另外，3年前馬神與兒子馬在驤曾以父子檔演出劇集《我家無難事》，馬神指如果有人再找他們合作拍劇都會接受，但兒子剛大學畢業，還未確定未來的路向。
