新盤沽清撤辣有效？
湯文亮博士 紀惠集團行政總裁
在財爺宣布撤辣之前，不少分析員都話撤辣無效，就算撤辣，樓市仍然會下跌10%，我當然唔同意這個講法，辣招鎖死購買力，單靠那些實力不足的首置買樓，樓市想唔跌都唔得，我擔心財爺同意那些大C講法，撤唔撤辣樓市都會下跌，一動不如一靜，唔撤好過撤，好彩財爺沒有被蒙蔽，不但撤，而且是毫無保留地全撤。
在撤辣之後，新樓貨尾單位出貨不俗，但始終唔夠代表性，日前有地產商推出百幾個單位，唔夠4個鐘頭就沽清，業界相當興奮，亦可以證明撤辣是有效，不過，應該仲有相當多新樓盤推出，撤辣才正式受到考驗。
賣了樓的人不希望撤辣
講開又講，在政府全撤辣之前，有做物業代理老友同我講，根據他們公司對客戶的問卷調查，有75%的客戶希望政府在今次財政預算案宣布撤辣，我再問清楚，是否是老友代理行對客戶的調查，老友話絕無花假。我相信老友講大話，因為代理行每一單生意都有一個買家，一個賣家，賣家絕對不希望政府撤辣，因為樓價有可能急升，賣了樓的人就會損失慘重，所以，由代理行做調查，結果最多五十五十，贊成與反對撤辣的人數是相等。
理由是有小部分買了樓的人都唔希望政府撤辣，那些就是要付辣招稅買樓的人，雖然人數不多，但依然有人付辣招稅買樓，甚至最近有買家付近億辣招稅，試問那個買家又點會希望政府撤辣，所以，如果由物業代理行做調查，唔希望撤辣的人一定多過希望撤辣的人。
