子豪婚禮唔使諗 畀鄧卓殷揸Fit
無綫藝人郭子豪早前在社交網宣布向女友鄧卓殷求婚成功，昨日二人出席活動時大放閃光彈。鄧卓殷坦言婚禮上有很多事情都未決定，很大機會下年才結婚。她笑言籌備婚禮全權話事，因未來老公什麼都沒所謂，婚禮上的大小事情均由她決定。
剛宣布婚訊的郭子豪和女友鄧卓殷昨日出席社交媒體頒獎禮，應司儀要求在台上咀嘴，大晒恩愛。鄧卓殷表示已開始籌備婚禮，但未定在什麼地方舉行：「好多嘢都未定，所以下年舉行婚禮機會大啲，唔想太趕。」她坦言想在外地舉行婚禮：「不過喺香港搞就方便親友。」問可擔心籌備婚禮時吵架？鄧卓殷笑言：「咁依家約法三章。」郭子豪則充滿信心說：「我絕對唔擔心！」
鄧卓殷表示與郭子豪甚少吵架：「通常佢話冇所謂，我就再決定，之後大家再傾。佢聽完我講會唔講任何意見住，等我講晒，佢再幫我組織。（想有贊助？）有贊助當然歡迎，希望有婚紗禮服或鑽飾贊助，不過最想賓客嚟到開心，我哋有個難忘婚禮係最重要。」
同場的馬德鐘表示早前做內地直播帶貨，但形式不太合適自己性格。對有傳他不想做內地帶貨，故不續約邵氏，他說：「唔關事，我依家都喺內地平台一路發展緊，希望再做好啲。最想分享健康產品，同埋正能量嘅嘢。（會喺鏡頭前騷身材？）有時做運動都會騷少少，但唔會為效果而做。（請你帶貨好貴？）唔好咁講，傾吓先啦。」
劉沛蘅與舊愛有聯絡
劉沛蘅穿吊帶低胸連身裙示人，被記者取笑跟洪卓立分手後可放任性感，她笑言：「我一向都係按照自己嘅喜好着衫。」提到洪卓立早前聲帶有事影響演出，劉沛蘅坦言雙方會為寵物事宜保持聯絡，故知道對方聲帶不適，現已康復七八成。問到可有追求者？她說：「有啲傾吓偈嘅朋友，但未去到了解階段。」
另外，李璨琛女兒李元元（Lucy）在母親陪同下出席活動，Lucy媽透露女兒經常重看自己網上的搞笑片段。Lucy面對鏡頭時十分害羞，她說：「如果一個鏡頭就唔驚，同埋我自己有相機，可以拍片，最鍾意拍妹妹笑嘅片。」
