與王浩信鬥演技惺惺相惜 陳浩民自爆有中年危機
陳浩民相隔16年重返無綫客串演出古裝喜劇《狀王之王》，飾演陳夢吉一角，當年有傳他嫌無綫人工奀而離巢北上發展，這次再演港劇，他要多謝好友兼劇集導演林子聰（肥仔聰）邀請，不過對方開出一個條件。浩民與王浩信鬥演技惺惺相惜，並自爆有中年危機，望平衡工作及家庭。
浩民雖然只是客串演出，但亦相當落力為劇集宣傳，日前他就接受香港文匯報專訪，久未演出港劇的他，開心表示終於可透過《狀王之王》回歸香港觀眾的視線。他很多謝合作無間的好友肥仔聰找他客串演出一角，不過有條件，他笑說：「佢話除咗主角，（演）乜都得，（冇諗過自薦演王浩信的角色？）我覺得冇必要去問一啲尷尬問題，大家好兄弟，可以用到你，自然搵你，就算對方唔搵我都替佢有呢個機會開心。」戲份不多的浩民，透露原本客串一個單元，但陰差陽錯，前年底確診新冠身體抱恙，加上劇組拍攝時間調動了，幸好跌了個橙，執返個吉，肥仔聰很好留返陳夢吉這個角色給他，雖然由五集變了一集，但也不緊要，他都是志在參與一過戲癮。
劇中他與飾演宋世傑的王浩信在公堂上唇槍舌戰，大家靠三寸不爛之舌去同對方過招。兩代小生首次合作，浩民事前亦做足功課，知道對方是兩屆視帝，亦有睇過對方的《踩過界》，他笑說：「我呢啲行家，一睇兩集就知係龍與鳳，（係龍定鳳？） 龍呀，就係我話得咗之後佢咪攞視帝囉，不過今次合作都令我喜出望外。」
拍過不少古裝劇，但少有拍公堂戲的浩民，直言今次的角色對他來說是個大挑戰，他說：「因為語速有力得來又要快， 要抑揚頓挫、落地有聲，又帶少少大戲腔，雖然只係拍四日，但第一日拍完已經好攰，好勞氣，攰過拍打戲，原本大家約咗收工後去食晚飯，結果到第四日才成事。」談到拍劇趣事，浩民笑指可能大家聽落有趣，但對他來說是一件苦事，因為大家連睡覺都沒有睡背台詞，當他背好對白之際，準備同浩信來個公堂大廝殺，豈料肥仔聰臨場飛紙仔，大家只好局住上，當然有壓力、有挑戰才有推動力，大家都是為件事更加好。
當居家男自認脫節
2008年拍完《搜神傳》後離巢北上發展的浩民，有指當時他嫌無綫人工奀，不過娛樂圈是無永遠的仇人，這次再與無綫合作，浩民亦曾放口風表示想返娘家拍劇，問到可有下文？浩民說：「之前疫情期間都有見過志偉哥（無綫總經理曾志偉），但嗰次純粹講其他，無關TVB嘅事，拍劇也隨緣啦，又唔好逼得人哋咁緊，我都發咗聲囉，佢哋要睇就睇到，有時要留返幾分薄面畀自己同對方，食檸檬唔通大聲話畀全世界知咩？之後再算啦。」問到他想跟哪位TVB小生、花旦合作？浩民自認脫節：「因為屋企連電視機都冇，畀我少少時間，加返到屋企就俾『四大天王』（四名子女）佔據晒啲時間。」他表示屋企的家頭細務及水電，小至換打印機墨水、通渠、換成組燈都是他負責，不過他不覺辛苦，都很享受家庭生活。
望平衡工作同家庭
浩民可說是圈中的多仔公鼻祖，問到可會再生小朋友？ 他亦不肯定：「 隨緣啦，但BB最困身，可能就會錯過咗同小朋友溝通嘅時間，同埋要睇小朋友功課，呢段時間就唔會。」浩民直言會比較着重小朋友的數學， 因為只有一個公式，問到他當年讀書數學成績是否很好？ 他笑說：「唔係，攞A啫， 不過我唔係有天分，只係靠死溫。」他只是想告訴子女知讀書成績好，都不一定成功，但如果不努力就一定不成功。
家庭幸福又不用愁生活的浩民自爆有中年危機：「就係冇咩追求。」 他又稱之前十幾年只顧着工作， 少時間陪他們，實在愧對家人。 問到現在是否搵夠？他直言冇人會嫌錢多，只是覺得做人要知足常樂，人比人，氣死人，視乎自己怎樣看， 現在希望工作及家庭取得平衡，以前他就是不懂這個道理。
