表現低沉 梅迪歷向球迷挑機一對一
英超褪色勁旅車路士今季表現飄忽，前晚竟於主場以2:4不敵狼隊，賽後排名只能位列11。球隊戰績低落，主帥普捷天奴都認低威，承認球員未夠好，但更麻煩是出現了連環的「公關災難」，烏克蘭翼鋒梅迪歷竟與球迷網上爆罵戰，更疑似邀約球迷「過招」，而隊長堤亞高施華的太太則在社媒暗示球隊應該易帥，相當尷尬。
自去年一月加盟車路士，梅迪歷的表現一直未達預期，有球迷近日透過Ig向該23歲球星私訊：「Ｘ你搞緊乜，係咪唔記得點踢波？踢得唔好，咪變吓囉，做吓單對單練習，每次你上陣，我哋都打少個！」梅迪歷之後回應：「嚟單對單囉，賭1萬鎊！」之後該球迷開始識驚，變得客氣稱：「兄弟由依家開始，你每次入波，我私人畀錢你，我哋全部車迷都想搞番掂呀！」該球迷將私訊公開，並堅稱無後悔向梅迪歷挑機。
另外，在昨仗完場前，施華嫂竟然網上發文：「係時候變喇，再等就遲喇！」英媒認為施華嫂意思係要換帥，未知施華面對主帥「肥普」時會否「面左左」呢？
