姚焯菲怕長大 唱出矛盾心聲
邁向成年難保持初心
人生在不同階段有不同的煩惱，有時因為環境轉變，有時因為心態轉變，有時因為身份轉變，甚至因為年紀而轉變。姚焯菲（Chantel）將於9月迎來18歲生日，象徵正式踏進成人世界，新歌承載着17歲的她腦袋中既想長大、又害怕長大的矛盾少女心，獲讚唱出成長中人的心聲。
採：記者子棠 攝：彭子文
姚焯菲剛完成香港的工作及假期，返回新西蘭繼續升學，留港期間她發布今年首支派台歌《初心小島》，以新曲風及演繹方式表達即將步入法定成年人的內心感受。粉絲留言稱讚她「唱出好多成長中人的心聲，好真摯感人」、「大人與小朋友也有共鳴」。
18歲代表邁向成年的轉捩點，Chantel坦言內心充滿矛盾：「《初心小島》唔係講我嘅初心，反而係講我搵唔番自己嘅初心。有花有草嘅漂亮小島代表原本嘅我，經歷一啲事走得好遠，依家受到某啲阻礙無法重回快樂嘅小島。MV亦係我拍過最難嘅一次，因為有好多內心戲要用微表情演繹，但演戲唔係我強項，特別係演微表情。」
沒從前般執着
她指MV反映出其內心世界：「可能人長大咗、認識多咗、眼界開闊咗，但顧慮都多咗，會有想逃離嘅狀態，返去嗰個有好多未知、好奇、無憂無慮嘅純潔初心之中。雖然我接受自己成長，明白想法會唔一樣，不過依家我仲未夠成熟，但又知道成熟後會有更多顧慮。其實我係想長大，又唔想長大，好矛盾。」Chantel坦言入行後壓力越來越大，沒有了初心的輕鬆，也沒有了初心的執着，曾有監製指她以前唱歌會執着唱好每一個音，但現在會視作一場表演，沒那麼着緊：「入行後經歷好多，好難返去自己嘅初心，或好難返去開心嘅時候，就出現呢個想法。」她希望藉新歌鼓勵年輕人，亦希望可以撫慰所有內心不安的大人。
她表示現階段最辛苦是讀書，特別是成績不似預期，像告訴自己多努力都沒用，是很大的打擊，她說：「可能我將成績目標定得太高，但如果唔高又冇意思。我最希望當然係每科都7分滿分，距離目標仍差四成。」她續稱：「我記得喺香港讀書時功課同測驗唔係咁多，但到咗新西蘭，我會講讀書真係難，壓力都大咗，可能因為有呢個反差。」她有自己的紓壓方法，就是每日定下時間表，當日完成功課和溫習後，晚上9時半至10時就讓自己停下來做其他事，例如睇劇、與父母通電話等，作為放鬆時間。
