粉絲捱冷苦等 炎明熹心痛道歉
天氣差影響拍劇進度
「人氣王」炎明熹（Gigi）日前到西貢拍音樂劇，吸引大批「Gi炎粉」到場追星。由於當日天公不造美，影響劇組拍攝進度，眼見粉絲冒風雨等候，Gigi非常心痛，完成拍攝工作即奔向粉絲堆道歉，足見她非常愛錫粉絲。
日前炎明熹、李爾晨、麥玲玲等於西貢泥涌石灘拍無綫全新音樂劇《戀上西沙》，Gigi以民族少女風及牛仔型格Look現身，為了應付其中一場彈結他場口，拍攝前她於家中反覆練習，相當專業。
拍攝當日氣溫雖然不算太低，但因陰天及落毛毛雨，加上頗大風，故Gigi休息時會披上超厚的「熊啤啤」大褸保暖。由於天氣影響拍攝進度，單是上午行程已超時兩小時，眼見「Gi炎粉」冒着風雨等了又等，Gigi大感不好意思，完成拍攝工作後，即拿着「大聲公」向粉絲問好兼道歉，結尾一句更說：「我都唔知講咩好，我說話係有限公司。」
「Gi炎粉」送熱湯應援
她接受無綫娛樂新聞台訪問時，再向粉絲道歉：「其實我一嚟到已經有部分粉絲到咗，我就知道弊傢伙，希望可以盡快拍完，但拍劇冇可能咁快完，所以真係好多謝大家喺度等。同埋今日陰天，有啲毛毛雨，所以比較麻煩。佢哋足足等咗兩個鐘，真係非常之唔好意思。」
Gigi開心表示最近多了機會見粉絲，搞笑「自責」不擅辭令而待慢粉絲：「其實我一直好想講多謝大家，但因為我說話係『有限公司』，最近都見咗大家好多次面，好似要講嘅嘢都講晒咁，已經諗唔到要再講啲咩，再咇又好似有啲造作，但可以同佢哋長時間見面，我自己真係非常之開心。」而「Gi炎粉」除了專程到場為Gigi打氣，亦為劇組送上熱湯，相當有愛。
