TWINS淚光中成長 感激同行22年
經典側手翻重現舞台
Twins前晚在紅館展開14場《TWINS SPIRIT SINCE 2001 LIVE IN HONG KONG》頭場演唱會，蔡卓妍（阿Sa）與鍾欣潼（阿嬌）又唱又跳，經典側手翻也重現舞台，首首歌曲都是「回憶殺」，全場觀眾由頭大合唱到尾。二人在台上眼濕濕真情剖白，很感恩一直互相扶持，友情從來沒變！
前晚Twins演唱會開鑼，吸引英皇老闆楊受成夫婦、天后容祖兒、關智斌、洪卓立、Gin Lee及泳兒等捧場。阿Sa與阿嬌披上拳賽戰衣登場，之後脫去戰衣，以粉紅色裝扮跳唱代表作《高手看招》、《明愛暗戀補習社》、《二人世界盃》等，當她們唱《跅跅步哈姆太郎》更重現初出道招牌側手翻動作，將全場氣氛推到頂點。
阿Sa說：「我哋出道咗400日就開第一個紅館演唱會，嗰時係一個奇跡，估唔到出道22年仲可以開演唱會，亦都係一個奇跡。」她坦言年紀愈來愈大，很珍惜每次與阿嬌開騷的機會：「好奇怪，我哋企埋一齊，就好似返番年輕時，冇老過咁，哈哈！」阿嬌說：「因為聽得多我哋啲歌囉！」阿Sa說：「我哋可能係傳說之中嘅不老之藥，哈哈！」
全場大合唱《下一站天后》後，阿Sa眼濕濕說：「22年前完全唔會想像到，呢個就係我哋嘅將來，雖然途中有好多大大小小障礙，從淚光之中走到呢個年紀，但係我知道無論係開心定唔開心，係人生高峰時刻，定係低潮時期，我哋終於從一個階段走到另一個階段，但係無論邊個階段，我知道你都會同我一齊，多謝你呀鍾欣潼。」阿嬌亦哭着說：「我以前成日做嘢都半途而廢，唯一冇放棄就係我哋嘅友誼。我好感恩可以遇見你，可以同你組成Twins，多謝你呀蔡卓妍。」
幫阿嬌慶生惹混亂
昨晚適逢是阿嬌生日，阿Sa呼籲全場歌迷在櫈底拿起海報，齊齊向阿嬌說生日快樂及唱生日歌，但因有歌迷衝向台前，又有人把海報的顏色調亂，未能統一「生日快樂」字句的畫面，阿Sa苦笑說：「呢單嘢我搞咗好耐，我嘅概念圖好靚㗎，依家變咗抽象派。」阿嬌笑言：「唔緊要，心意我收到晒啦，多謝大家。」最後Twins唱《風箏與風》為頭場演唱會完美落幕。
