傳奇球星賽 港台有得播
經典重臨 回憶返晒嚟
既有亞洲盃，又有非國盃，還有歐洲五大聯賽都已相繼重開，今個周末要睇好波，對於球迷來說肯定大滿足。不過，究竟有乜好波最要捧場呢？對本港球迷來說，卻可能是明日在香港大球場上演的「世界足球傳奇盃2024」，包括傑斯、奧雲、科拿與麥馬拿文等經典球星齊齊來港獻技，有時間記得入場支持，否則亦可選擇在家睇直播，港台電視32同香港電台第二台都會全程放送呀！（開賽時間：周六4:00 pm）
今次的「世界足球傳奇盃2024」大名單絕對星光熠熠，雖然本來打正旗號由奧雲大師隊對史高斯傳奇隊，但主辦方日前已經宣布，曼聯名宿史高斯因為感染肺炎無緣訪港，改由其「紅魔鬼七小福」老友傑斯接棒頂替，相信「紅魔鬼」球迷都會同樣支持。
賽事名單尚有葡萄牙前世界足球先生費高，又有皮利斯、基拔圖施華、史米沙、希斯基、布朗與基利士比等，亦有本地名宿如劉榮業、山度士、李健和、林嘉緯與盧均宜等，賽事由周末下午4時開始，分三節各踢30分鐘，據聞現時門票仍未售罄，在購票通有售，真正球迷萬勿錯過。
英超兵水戰 免費電視送上
至於今個星期的外地直播波焦點，應是英超阿仙奴對水晶宮之戰。英超近兩周以「半歇冬」形式舉行，原本一周賽事拆開兩星期各五場上演，明晚的「兵水戰」連免費電視台都有得播，自然格外受到關注。（Viu TV 96台、NOW 611及621台周六8:30pm直播）
剛在英足盃被利物浦淘汰的「兵工廠」，連同聯賽計，已經在各項賽事錄得3連敗及4場不勝，狀態平平，不過今戰回師主場，遇上聯賽中下游的水晶宮，客隊亦是剛在英足盃重賽後被愛華頓踢走，狀態反覆，以兩軍近3次交手都由「兵工廠」獲勝來看，今場應是阿仙奴重返勝軌的好機會。
