地盤捱出頭開個唱 吳浩康曾被張致恆騙
![◆吳浩康邀地盤兄弟睇個唱。](https://dw-media.tkww.hk/epaper/wwp/20240115/TXT_JPG/b06c.jpg)
香港文匯報訊(記者 子棠)吳浩康(Deep)最近密密在地盤工作養家,被稱為「職安真漢子」的他亦捱出頭,獲主辦商支持在下月24日元宵節在水上樂園AQUALAND舉行個人演唱會:「主辦單位好疼我,覺得我屬於舞台,所以幫我搞呢次音樂會。我都好多年冇舉行個人騷,今次唔會加太多新Idea,想保留歌曲的原汁原味。囝囝會入場睇騷,但唔會上台做『嘉賓』;佢仲咁細個,我都擔心佢會走嚟走去和突然扭計,會唔知點算,又驚睇唔到佢,否則要抱住佢唱。」Deep一講到囝囝就冧晒,又指囝囝經常眼定定望着他唱歌。
Deep日前「停工」一天為個唱拍攝海報及宣傳片,並配合現在的身份以一身工業風造型亮相,還出動私伙安全帶拍攝,即使爬上高台拍片唱歌,危坐幾層高鐵架亦毫無懼色。他還落手落腳裝拆欄杆,手法專業:「其實我都擔心有人誤會我做地盤係宣傳,有網民話我響地盤唔駛做、行行企企,我都想問吓佢有冇呢啲筍工介紹。不過都唔理得太多,明我嘅人自然會明,唔使解釋太多。今次會送飛畀平時出生入死嘅地盤兄弟睇,佢地揀啲歌好大熱所以一定會唱。」Deep坦言一場唔夠喉,盼粉絲買飛打動主辦單位加場。提到網民將張致恆與Deep作比較,他表示都有留意相關消息:「作為佢嘅兄弟,我同大部分人都一樣俾佢呃過,但做朋友就唔會多講,我只想畀佢嘅家庭同成長留返啲空間。」