湖人屠龍 爆「明星哨」爭議
罰球36:13 AD多於對手全隊
甘冒被NBA聯盟重罰風險，速龍教頭拉查高域昨晨在作客以131:132飲恨湖人之戰賽後，公開炮轟球證執法偏袒對手，更聲言假如必須速龍落敗，何不早點通知他們，讓該隊不用到場受辱！昨仗末節出現湖人在罰球上有23:2的驚人優勢，湖人中鋒「AD」安東尼戴維斯今場個人14個罰球更是已較速龍全場13球為多，「明星哨」爭議迅即成為全球籃球迷熱話！
「AD」昨晨全場17投13中，罰球則是14投13中，全場累積交出41分11籃板6助攻表現，當中在末節便個人攻入20分，包括了11個罰球全中。湖人末節罰球的全面佔優，其實也與速龍在末段刻意犯規追分有關，但全場兩軍的罰球數差距達到36:13，卻確實引起了不少關注。
拉查高域在賽後記招中，多次拍枱大鬧：「真係好奇怪，今晚搞乜，離晒大譜！呢個係恥辱，球證嘅恥辱，聯盟容許佢哋發生嘅恥辱。第四節罰球23:2，仲可以點打呀？我明白要尊重全明星，但我哋都有明星球員呀！史葛迪巴尼斯（速龍前鋒）都係明星級別，佢每次剷籃都好落力、唔插水、唔會博犯規，結果佢全場得兩次罰球，邊有可能㗎，你點解釋我聽？」
拉查高域：要我哋輸早講
這位首年執教速龍的主帥再補充：「佢哋一定要贏咩？係咁你早講嘛，我哋唔使嚟，畀佢哋贏囉！但今晚真係唔公平，唔係第一次喇，真係好離譜。」史葛迪巴尼斯今場攻入26分，施安簡都為速龍攻入25分，而速龍隊員達迪奧斯楊格指拉查高域的說話是為球隊說出，他們都是一家人。勒邦占士今場交出22分12助攻，為湖人帶來過去一個月以來首次連勝，「大帝」對於偏幫的質疑，只簡單回應：「我覺得佢哋犯規，而我哋冇乜囉！」
