車仔拯救賽季 易得「米」
9蛋連珠 往績一面倒
英聯盃準決賽首回合，英冠米杜士堡主場對英超車路士。車仔季前大灑金錢豪花逾4億鎊擴軍，是英超支出最大球隊，於聯賽榜暫排第10當然難交代。領隊普捷天奴亦意識到贏得國內盃賽，是拯救失敗球季的捷徑，難得英聯盃已晉身4強，當然有加零一戰意搶盃。「藍戰士」目前質素、兵源及狀態都遠在米堡之上，加上近年有一面倒往績支持，今仗作客讓到一球亦見信心，推介車路士上盤。（HOY TV 77台周三4:00am直播）
車路士開季成績脫腳，主因是新兵太多亦太年輕，加上一直受嚴重傷兵問題困擾，令新帥普捷天奴難以大展拳腳。不過球隊近期傷兵災情稍見緩和，英超近4戰3勝，英聯盃8強戰互射12碼淘汰紐卡素，剛於英足盃第3圈則主場4球大炒英冠普雷斯頓，狀態既穩且勇。普捷天奴賽前亦聲言，球隊今季不必兼顧歐洲賽，會以強大決心爭奪國內兩項盃賽，今仗勢必強陣爭勝。車路士今晚首回合作客米杜士堡，然後兩周後返主場踢次回合，不過普帥無需等次回合才搏殺，皆因車路士遇上「無渣私房菜」！自2007年起，車路士9次與米杜士堡對賽不但全勝，而且從未失波，9仗合共贏21:0，包括前季英足盃作客贏2:0，結合近期3連勝共入9球強勢，再訪河畔球場必以贏波為目標。
米堡3日前英足盃耗力多
米杜士堡前年10月聘得曼聯名宿卡域克領軍，迅即帶領球隊走出低谷，上季領軍由接手時的英冠第21位，升上常規聯賽結束時第4位，最終只在附加賽飲恨未能升班。不過今季在各界注目下，米堡表現卻相當反覆，至今僅排12位明顯未達期望。球隊剛於3日前英足盃主場強陣火併維拉，力拚至末段失守輸0:1，比賽大部分時間處下風，僅靠門將湯高華力挽狂瀾才不致多失。而且強陣出擊，體能損耗大，面對剛輕取普雷斯頓兼兵源充裕得多的車路士當然蝕底。米堡今次是自2004年以來首次殺入英聯盃4強，相反車路士在2015年奪冠，近年亦兩度殺入決賽及一次打入4強，爭盃經驗遠在米堡之上，即使作客亦有足夠條件先拔頭籌。
