政府代替業主被駡
湯文亮博士 紀惠集團行政總裁
我唔知其他收租佬，我很少幫襯做食肆的租客，更加怕他們叫我去幫襯，因為一定是生意唔好，並不是真的叫我去幫襯，而是叫我去睇吓他們的生意，最後要求減租，我唔會唔去，但不是他們的指定日子去，很多時當我去到的時候，發覺生意唔錯，而且不斷翻枱，租客就會話，人流唔錯，不過旺丁不旺財。
以往做食肆的老闆生意唔好，唔會檢討自己，反而第一件事就會話租金太貴，業主無良，但叫他們終止租約不但唔肯，仲要簽長約，我有時都不明白他們的心態，不過現在有人代替了業主，我講大家都未必會相信，就是香港政府。
禁止外遊乃強人所難
去年聖誕假期生意不俗，任業界講到點樣差，都只是比前年少一成，記得前年聖誕，香港仍未解封，港人被迫留港消費，搞什麼staycation ，消費額一定高，去年解封，有這麼一個長假期，港人全家去旅遊是很正常，多了人出外旅遊，香港內部消費受到影響亦是可以理解，但業界發言人對市民外遊，怪罪於香港政府，認為政府能夠禁止市民外遊，他們的生意不但不會減少，反而會增加，試問香港政府又點可以禁止市民外遊，簡直是強人所難。
雖然飲食界代表睇淡市況，但事實上尖沙咀、蘭桂坊、銅鑼灣等人頭湧湧，很多食肆都可以做到幾輪生意，當大家想知道業界怎樣自圓其說，發言人話，雖然人流不俗，但旺丁不旺財，今次真好，政府代替了業主，成為飲食界人士發洩對象。
