2023通關在即 走過隔離的日子 演藝人齊祝願 同踏復常路 前景滿希望
香港經歷了3年疫情，隨着病毒的演變，本港疫苗接種率大幅提升，特區政府在過去數月穩步有序調整抗疫措施，讓市民生活逐漸回復正常，雖然疫情仍未消失，但內地宣布2023年1月8日起將與境外通關，香港居民入境內地也不再需要集中隔離，對遊走在內地與香港發展的藝人來說是最大的喜訊。2023年伊始，大家踏上復常之路，香港藝人在新的一年向香港文匯報讀者送上祝福之外，他們也相信經歷疫情磨難後，在共同努力下，市道一定能復甦，新一年的前景充滿希望！ 文：娛樂組
劉青雲張家輝更重視健康
影帝劉青雲在這兩年多的疫情下，生活都受到很多限制，過去一年，他只外出過一次吃飯，空餘大部分時間也是跟太太郭藹明居家與世隔絕，所以踏入2023年元旦日，青雲期望是：「我最大嘅願望就係疫情快啲搞掂啦！大家可以快啲除口罩，開開心心見吓真面目啦，通關不用再隔離，過正正常常嘅生活，就算唔咁快完全正常，都令大家感覺到慢慢復常！」
青雲個人願望是希望家人和身邊朋友都身體健康：「尤其是經過咁嘅事（疫情）之後，大家都明白到健康係幾咁重要！」
踏入新一年新開始，2023年自己工作上有新突破，青雲說：「我相信我會有一啲新工作，應該唔係拍商業片，係另一種類型嘅，相信好快會同大家見面！」
另一影帝張家輝就祝願讀者們新一年開開心心：「祝大家新年進步、恭喜發財！無論如何都祝大家身體健康，快啲回復正常生活水平，令到大家都開心，開心對我哋香港太重要，我祝願大家開開心心。」
確實，人就這麼一輩子，開心最重要！胡定欣、龔嘉欣、劉穎鏇都祝福大家過得開心又充實！視后胡定欣說：「2023年我祝大家身體健康，疫情快啲過去，大家工作順順利利，可以做到自己想做嘅嘢，最緊要開開心心！」備受TVB力捧的小花劉穎鏇送上祝福：「Happy NewYear，祝大家新年快樂，最緊要係身體健康、開開心心、快快樂樂，所有事都要順順利利。」龔嘉欣亦謂：「新一年祝福大家所有嘢更加好！最重要最重要最重要就係身體健康！每一日都過得開心及充實。」
上位小生花旦 盼越來越好
唱而優則演的JW（王灝兒）表示：「2023年希望大家一定要健健康康，開開心心，去多啲旅行，同睇《痞子殿下2》。」
上位小生周嘉洛成為廣告新寵兒，不停有商演活動搵真銀，他也祝願大家荷包大脹：「新一年祝大家身心愉快、身體健康，最緊要係心想事成，長做長有，越搵越多，越來越靚，咩都越來越好就冇得頂。」
姚子羚上月受到客戶之邀，與曾志偉、馬國明齊齊現身新加坡一個頒獎禮活動，近年積極為事業衝刺的子羚表示：「希望新一年事業和愛情運都好，期待自己有份演的兩部劇《狀王之王》和《一舞傾城》會跟觀眾見面，也希望疫情能盡快過去，大家可以盡情飛去世界各地旅行，始終都有好幾年不能出外，自己去年有幸寓工作於娛樂到新加坡，希望復常後大家可以去更多不同地方，自己也想拍更多好劇和嘗試不同範疇的新事物。」
林盛斌劉佩玥 想「報復式」旅遊
「最強CP」林盛斌（Bob）和劉佩玥（Moon）合體向大家送祝福，Moon表示：「新嘅一年有好多『希望』，而我最希望係疫情之後，大家可以快啲飛來飛去、到唔同地方去玩、去食，最緊要身體健康！」Bob附和指：「啱啱過去嘅兩年，大家都困咗好耐，希望大家去到自己鍾意嘅地方旅行吓，最緊要保持身心強壯，仲有腎都要強壯，做個好腰好腎好男人！」對於新一年的展望，Bob表示與Moon在《萬千星輝頒獎典禮2022》中有提名，打入「最佳女主角」、「最受歡迎電視女角色」、「最佳男配角」及「最受歡迎電視拍檔」十強，希望新的一年能有個獎作為嘉許及鼓勵自己。
張振朗和吳若希均希望大家都可以無所顧慮地放心去旅行，張振朗說：「恭祝大家新年快樂、身體健康、心想事成、路路暢通，希望疫情快啲過去，等大家去旅行玩返轉，每一日都開開心心。」吳若希說：「祝大家2023年所有事都事事順利，仲可以周圍飛去旅行，玩得開心、玩得盡興！」
蔡思貝望早日脫口罩笑面迎人
視帝陳豪祝願新一年社會能盡快復甦，疫情盡快過去，香港經濟變好，大家生活如常，在沒有疫情下無憂無慮地生活！視后蔡思貝同樣期待見到社會復常後氣氛轉好：「新年快樂，新一年自己大計都是工作為主，希望可以拍到更多廣告和電影，我會繼續給力向前衝，有更多好角色讓我發揮。新年也希望大家都健健康康！精精神神過年，不用再戴口罩，可以笑面迎人，社會開始復常後希望氣氛會變好，始終戴口罩多時，見不到大家的面孔很慘，希望大家能脫下口罩，分享更多微笑。」
袁偉豪去年作出新嘗試，在音樂創作上親力親為，作曲作詞監製等都一手包辦，目標是能做一位全能藝人：「新年願望是疫情盡快過去，大家有更多工作機會，不用再戴口罩，最重要人人身體健康。工作方面新一年會在音樂方面努力，希望寫到更多新歌，也會繼續拍劇演更多好角色。」
入行18年、去年終獲「最佳女主角」提名的陳自瑤，坦言希望新一年事業上有新的突破，參與更多劇情和綜藝節目，也想嘗試適合自己的生意，自己身體更加健康。另外見社會開始復常，她也希望人人都有工開，大家都可以賺多一點！
炎明熹冀不忘初心 姚焯菲欲全力以赴
炎明熹（Gigi）與姚焯菲（Chantel ）在疫情之下上學兼工作，對她倆可算是人生中的一場新體驗，尤其Gigi曾經確診，明白健康的可貴。踏入2023年，Gigi也祝願：「新嘅一年，我希望大家可以健健康康、開開心心，寄望疫情可以快啲過去！」Chantel則對唱歌興趣甚為濃厚：「新一年希望可以唱多啲好歌畀大家聽！」談到新年大計，Gigi想了想笑說：「我有咩新年大計呢？其實我唔係經常自己set嘢畀自己嘅人，但一直冇變嘅一樣嘢係一直保持初心，希望自己可以不忘初心啦！」Chantel也沒什麼雄心壯志，但新一年仍會全力以赴：「我覺得所有嘢都係順其自然啦，希望可以做到最好嘅自己！」
3月首開紅館騷的馮允謙對於今年的工作發展已有初步計劃：「新一年祝大家Happy New Year，大家開開心心、健健康康， 2022年尚未達成的目標， 2023年能完成自己的目標和夢想！」
陳煒冀見經濟逐步向好
去年甜嫁醫生男友的陳煒就相當實際，放眼經濟，把握賺錢的黃金機會：「Happy New Year，希望2023年有新氣象，新嘅一年疫情快啲完全減退，市道開始慢慢復甦，經濟越嚟越好，大家都搵多啲錢！」
待嫁新娘連詩雅就希望大家都找到自己的幸福：「祝大家新嘅一年身體健康，開開心心，有情人甜甜蜜蜜，就算單身都可以盡快搵到心上人！」同樣蜜運中的陳庭欣說：「祝大家Happy New Year、新年進步，未來一年祝大家心想事成，日日都過得開心，百毒不侵，疫情盡快遠去！」楊卓娜祝願說：「祝大家在新的一年，最緊要身體健康，個個百毒不侵，工作順利，事事順利，大家都開開心心！」
梁詠琪楊千嬅 祝願心想事成
梁詠琪闊別紅館5年，今年2月將再度開唱，家庭事業兩得意的她祝福大家：「2023年到了，祝大家新嘅一年心想事成，想嗰樣得嗰樣，最緊要係身體健康，新年快樂！」剛於上月中假亞博順利舉行一連兩場音樂會的楊千嬅，誠心向讀者們祝福說：「新嘅一年，祝大家身體健康，心想事成！樣樣順利！」
