《談判專家》上映6日票房理想　劉青雲將罕有謝票

（大公文匯全媒體特約記者 陳惠芳）由劉德華監製、邱禮濤執導，兩大影帝劉青雲及吳鎮宇主演新戲《談判專家》上映六日（截至6月18日），本地票房衝破850萬，成績理想。為答謝觀眾支持，今個周末（6月22日），向來鮮有公開謝票的青雲，將會聯同邱禮濤導演、戲中「人質」3人組包括顏卓靈、楊偉倫一同現身戲院與大家見面。

影片除兩位影帝及一眾配角精彩演出，獲觀眾讚賞外，周文健（Michael）及楊偉倫（阿卵）生鬼有趣的表現緩和戲中談判氣氛。Michael開心並分享感受時提到，非常榮幸今次跟青雲相隔多年再度合作，又談起陳年趣事。他說：「我本人最深刻嘅對白，就係我臨死之前嗌『媽媽』，因為現場啲觀眾笑得好開心！」Michael與青雲戲中擦出火花，原來兩人相識多年，青雲早前專訪亦提到今次很開心再跟Michael相遇，Michael都有同感：「31年前我哋一齊拍過《七月十四》，之後我地仲拍過《運財童子》！佢個英文名亦都係我當時幫佢改嘅，Sean！所以咁多年後好似見返一個失去嘅老朋友咁，咁多年冇合作但係仍然有返我哋以前演戲嘅默契。同劉生做戲好有安全感好有信任，好舒服！青雲曾經同我講過，Michael你唔好以為你好笑，只不過見到你忍笑嘅樣我先笑㗎咋！」

戲中與青雲抗衡到底，還有姜皓文飾演的重案組警長李志斌，過程中又要跟另一談判專家謝家俊（吳鎮宇飾）合作，黑哥周旋兩大影帝之間，他就形容跟兩位鬥戲相當精彩：「同青雲哥有一場落口供嘅戲，同埋另外一場喺臭格入邊佢逃走嘅戲，我都好深刻。另外對我嚟講，鎮宇哥係不嬲好Cool㗎嘛，喺現場就算拍戲都少傾偈，但係今次可以喺戲入邊，直頭兜口兜面對佢呼呼喝喝，過戲癮之餘自己都覺得好過癮。」