（大公文匯全媒體 特約記者 陳惠芳）恢復單身的歐倩怡（Cindy）日前終開腔首談與郭晉安離婚的原因。她說因為2019年的一場大病，令她改變了人生觀。她提到「隔籬嗰個」照顧她的方式，在網上造成不少迴響，有人狠批郭晉安見死不救，亦有人覺得歐倩怡表現「忘本」，對於網民的反應，歐倩怡亦有回覆。
歐倩怡（Cindy）日前接受網上節目訪問，她提及在40歲時曾兩度患重感冒，反覆發燒睇三次醫生仍未痊愈。有一晚於凌晨時分突然感到由左手中指像觸電般流通全身，而且無法呼吸，當時歐倩怡向郭晉安求助：「我話我唞唔到氣，幾乎講唔到嘢，跟住佢話『咪玩啦，瞓覺』。」其後郭晉安見到情況「唔對路」，歐倩怡說：「開始起身Google睇吓係咪call白車，跟住搵到個片糖沖熱水畀我飲。佢已經驚我嘔，喺床上拎住個痰罐，（片糖水）我飲咗少少，其實嗰一刻我已經去到失禁，我覺得自己應該唔得㗎喇。」
訪問播出後，因節目罕有地關閉留言功能，於是有網民湧到歐倩怡的個人社交平台留言，有人覺得歐倩怡：「忘本……學費何來？」她大方回應：「係呀，我有好好多謝佢。感情事係咁，無得計嘅。大家依然係屋企人。多謝你支持啊。」不過亦有人撐歐倩怡：「佢都有多謝佢，幾時有講過只係靠自己努力？一陣佢講郭生又畀人話消費郭先生。點都係畀人鬧，唔通又要郭生出不斷喺公開場合多謝歐倩怡幫佢生仔照顧屋企，啲嘢又冇人講過嘅，淨係不斷放大郭生啲錢，佢名下嘅物業都冇一個係歐倩怡個名啦，股票又轉走晒，一個女人而家靠自己出嚟打工……」
後來又有網民評論說：「睇完之後，唔明點解你半夜呼吸唔到，身邊嗰個唔報警，仲有時間上Google！Anyway，恭喜你展開新生活，努力。」、「你暈咗後，當時嘅另一半有無扶你起身，點解會仲係個痰罐度until第二朝？」歐倩怡回覆：「佢當時係驚，唔知發生咩事。」接着歐倩怡亦再補充：「我真係斷片式暈咗，發生咩事都唔知。」不過亦有人直斥：「人哋郭晉安一句聲都冇出，你就咁多嘢講，向前看啦！」歐倩怡亦大方地說：「係！thanks。」
歐倩怡在2006年結婚後已淡出娛樂圈，專心相夫教子，但多年來不斷進修，除了成為碩士外，亦考獲不少牌照，但她在訪問上自覺讀太多書反而蝕底，她此言又被網民批評：「咁嘅學歴叫勁得滯，真係笑大人個口，fyy讀埋碩士都未講得出呢番說話。」而歐倩怡回應：「多謝提醒，其實我都知我好渣㗎咋，好多嘢都唔識，同無記性。嗰個純粹係節目效果。學海無涯啊！」有網民問她有否再玩交友app，歐倩怡坦言：「入面好多壞人同假account，要小心。同埋我好奇，玩咗一個月，覺得悶，又無玩啦！」
可是仍有網民表示不滿說：「睇返志雲飯局，原來你3個月就去安仔度同居，離婚唔知有冇3個月就玩交友app，仲喺度講自己前夫點衰點衰！」歐倩怡表示：「都兩年啦~同埋搵人傾下偈唓，無做壞事。我而家都同你傾偈啦。」接着又有人留言：「多謝你放過郭晉安，地球又多一個筍盤。」歐倩怡則回覆：「係呀，佢好好的！」甚至有人說：「真係戥郭晉安慘！！你真係太over了。」歐倩怡亦說：「beli bala 作風只限鏡頭前。」
