（大公文匯全媒體 特約記者 陳惠芳）張國榮《繼續寵愛·二十年·音樂會》昨晚（4月1日）紅館舉行，郭富城於最後驚喜現身，在20名舞蹈員伴舞下，演唱《Monica》更重現哥哥經典舞步，觀眾紛紛站起跟着一起跳兼報以尖叫聲，氣氛高漲。
郭富城唱畢《Monica》後，指着天及向天送上飛吻，接着他說：「今晚係一個好特別嘅日子，20年，哥哥一直喺我哋嘅心入面，一直都喺度。我記得我入行第一個騷，係1986年嘅《星光熠熠耀保良》，我好有幸同佢表演，不過嗰陣做dancer，好榮幸好開心曾經為佢伴舞。我仲記得佢仲請我哋食飯，對dancers好好。其後我做咗歌手，一直都覺得佢先係真正嘅舞台王者，冇人代替到。佢成笑住對dancers講：『畀心機，畀心機！』我真係有畀心機㗎。雖然過咗咁多年，相信全球歌迷都好錫Leslie。」接着郭富城演唱張國榮第一首金曲金獎歌曲《有誰共鳴》，唱到一半郭富城說：『我好記得哥哥攞第一首金曲時，唱呢歌時話：『我唱呢隻歌唱到眼濕濕，以後我唱呢首歌都要笑住唱。』」然後着觀眾一齊拍手，場面感人。
音樂會完結前，現場熒幕播出哥哥與摯愛唐鶴德的合照，唐唐錄音獻聲悼念哥哥：「古人有一句說話係咁樣講：『死而不亡者壽』，原來死亡並唔係一個終結。被遺忘嘅，先至係。好幸運，哥哥喺佢呢20幾年嘅演藝生涯裏面，佢演過好多令人印象深刻嘅角色；唱過好多動人心弦嘅歌曲；亦都留底咗好多姣、靚、型、寸嘅舞台表演，呢啲都成為咗我哋嘅集體回憶。更幸運嘅係，哥哥有一班一直以嚟都咁愛佢、咁錫佢、咁掛住佢嘅好朋友、歌迷同影迷。我喺呢度代表哥哥衷心咁多謝大家。今日係一個特別嘅日子。我哋就趁住今晚呢個機會，一齊回憶哥哥嘅過去、回憶佢嘅真、善、美，延續對哥哥嘅愛同思念。繼續寵愛，張國榮。」
郭富城在接受訪問時，直言跟哥哥有很多難忘回憶，他表示他剛出道哥哥已是天王巨星，但Leslie對人毫無架子，好錫dancers，他現在也好錫dancers，相信這就是傳承精神。他選唱《Monica》和《有誰共鳴》是感到很有意義，希望用這兩首歌去懷念對方。
相關報道：
