（香港文匯報記者 黃書蘭）成日拎住《蘋果日報》一人「和你Lunch」搞搞震嘅「Lunch仔」李國永，日前出席反黑暴KOL石房有嘅網台節目，仲大爆有「黃媒」記者因「我唔聽佢嗰套即反面」，「Lunch仔」話：「我一世都唔會再聽佢嗰套，我有我做，佢有佢作！」咁樣「通敵」法，唔少攬炒派「政棍」喺節目後，紛紛叫「手足」unlike「Lunch仔」，但唔少攬炒派分子都話，「Lunch仔」咪又係「黃絲」養出嚟。
「Lunch仔」日前出席石房有（Man哥）嘅網台節目，響一間被標籤為「藍店」嘅餐廳做直播各抒己見。「Lunch仔」喺節目度將「黃納粹」問題攞咗出嚟講，話有個跟住佢18區周圍影嘅「黃媒」記者，因「我唔聽佢嗰套即反面」。
節目過後，唔少攬炒派分子就認為「Lunch仔」「通敵」，隨即吹雞話要同「Lunch仔」割席，鬧「Lunch仔」上反黑暴網台節目。好似攬炒派離島區議員王進洋就喺facebook發帖話：「請unlike facebook page『Lunch哥的抗爭生涯』……我點唔中（鍾）意自己陣營嘅手足，我都唔會靠攏敵人。」攬炒派屯門區議員甄霈霖亦話：「見 post 即 unlike unfollow 『Lunch哥』……佢已經為『名』走火入魔……有鏡頭有流量就乜平台都上。」
「黃媒」造星害死人
不過，亦都有攬炒派中人直言「Lunch仔」就係「黃絲」、「黃媒」捧出嚟。鄭松泰（蟲泰）就話：「公道講句，今日先出來×『Lunch 哥』的人及『黃色議員』，是在欺凌弱勢社群，行為令人噁心；要×的話，你們應該×自己，是因為你們的邪惡心腸，把明顯的『病患者』推去政治的火坑活葬……別以為叫人unlike 就能夠為自己的惡行開脫！造成『黃絲精神病』，你們是元凶（兇）！」佢仲上載咗張「黃絲」藝人何韻詩fb截圖，見到何韻詩分享《蘋果日報》有關「Lunch仔」嘅報道話：「有種堅持叫『David』。」
「佔中」牧師袁天佑個仔袁健恩亦話：「我係覺得傳媒係（喺）呢件事上有唔少責任……為左（咗）繼續有報道寫，就拎左（咗）呢啲人出黎（嚟），不論佢本身有冇問題都好，無大台嘅運動根本唔應該追住一個人黎（嚟）報……」
「熱血公民」副主席鄭錦滿就話：「《蘋果日報》、《立場新聞》一手捧紅的『Lunch哥』！」「David Mak」亦話：「都唔只佢，包括晒所有《蘋果》『造星』出品！」
原名葉鍵濠嘅電台主持健吾就笑言，「Lunch仔」喺「黃媒」吹捧下，早六七年可能仲做到攬炒派立法會議員：「在『民主大報』撐著（着）眼睛講大話的人都可以做區議員。他這種人材（才），可能可以在立法會撈返一官半職。」
鄧家彪：迷途青年早日回頭
「黃營」將件事睇到咁負面，建制派就覺得年輕人肯溝通可能有轉機。工聯會九龍東總幹事鄧家彪就話，新年新景象，反對派新悍將「Lunch仔」，竟然同「Man哥」喺「藍店」食Lunch做直播，認為「Lunch仔」嘅轉變令佢對今年充滿希望，「對迷途嘅年輕人真係需要春風化雨，令佢地（哋）早日回頭。」
