（香港文匯報記者 甘瑜 報道）美國大選點票上，目前都係民主黨嘅拜登領先，咁就搞到一班覺得特朗普贏先會「制衡」到中國嘅「黃絲」玻璃心碎。喺連登討論區等「黃絲」陣地都見到佢哋受唔住刺激嘅言論，仲有人自我催眠特朗普已經贏咗，真係令人擔心佢哋嘅心理健康。有啲「黃絲」就鬧爆美國大選有得郵寄選票，乜佢哋唔係不嬲都覺得美國嗰套係最好㗎咩？
美國大選開咗兩日票，班「黃絲」似乎都受刺激咗兩日。前日《蘋果日報》個facebook專頁講美國大選，已經有啲「黃絲」自製假新聞話特朗普已勝選，到噚日凌晨《蘋果》出post話「拜登有望勝出選舉」，已經有「黃絲」話「有傳威斯康辛（星）州總票數多過已登記選民」，想製造選舉「黑幕」，但事實根本就係流料；有人話密歇根州拜登有「100%新增選票」，但其實就係選舉數據公司職員入錯數，同官方點票程序無關。仲有啲「黃絲」直情覺得特朗普輸都係因為中國，話係中國「種票」喎，真係睇到大家得啖笑。
自己人講事實反被鬧爆
「黃絲」神經病發，連自己人講少少事實都俾人鬧爆。前大專學界國際事務代表團發言人張崑陽，喺佢個fb專頁撰長文同引述美國事實查核媒體報道拆解話拜登出術嘅流言，即刻俾「黃絲」網民圍剿，質疑佢「第日幫拜登做野（嘢），幫佢洗白都好正常」；「港獨」分子、前「學民思潮」成員許穎婷批評兩句特朗普亦被「黃絲」瘋狂謾罵。
理智上肯接受現實嘅「黃絲」，佢哋嘅心理健康都令人擔憂。「Samantha So」開始幻想︰「（拜登）會唔會一陣就心臟病發咖（㗎）？」「Mina Shih」話︰「都唔知佢有冇命做落去。」就係要幾陰險惡毒，有幾陰險惡毒。
睇埋連登嘅情況，網民「思覺失調患者」前日已經出post話︰「又係我，我係未來人，100%侵（特朗普）將會贏，侵輸咗，我會派10000比（畀）留名者」「請你食凍柑」就留言話︰「樓主你個名……」
至於噚日嘅討論，一班「黃絲」就不斷挑剔美國嘅選舉制度。「MILNER」話︰「有咩×野（嘢）理由點×晒票站既（嘅）票都仲可以收郵寄選票。」「哈利路呀」就不滿美國要點咁耐票話︰「永續點票。」「勿望我」直情質疑美國選民︰「點解咁多『鬼佬』po韓星gif去慶祝登登票數領先？」
乜「黃絲」唔係不嬲都覺得美國咩都好咩？做咩突然又輸打贏要呀？
